Reglur

Reglur Heimavistar MA og VMA

1. Heimavistarstjóri ber ábyrgð á daglegum rekstri og hefur umsjón með daglegu eftirliti með umgengni, aga og reglum í samráði við skólameistara Menntaskólans á Akureyri og Verkmenntaskólans á Akureyri.

2. Ábyrgð á að þessum reglum sé fylgt hvílir á hverjum einstökum íbúa í samræmi við ákvæði skriflegs leigusamnings sem sérhver íbúi og hlutaðeigandi skóla­meistari gera sín á milli.

3. Heimavistarráð er hagsmunaráð íbúa heimavistar. Heimavistarráð er skipað sjö fulltrúum sem eru kosnir á almennum fundi heimavistar í upphafi skólaárs. Skipuð er þriggja manna nefnd sem sér um undirbúning og framkvæmd kosninga til heimavistarráðs. Kosningar skulu vera leynilegar. Allir sem búa á heimavistinni hafa rétt til að kjósa og bjóða sig fram í heimavistaráð. Ráðið skiptir með sér verkum í samræmi við starfsreglur sem skólaráð beggja skólanna hefur staðfest. Fulltrúar í heimavistarráði eru einnig kosnir til að vera í mötuneytisráði. Heimavistarráð kýs sér forseta, sem stjórnar fundum þess og undirbýr mál er varða heimavistina og íbúa hennar, og ritara, sem heldur fundabók um fundi ráðsins og annast skjalavörslu. Ritari er jafnframt aðstoðarmaður forseta og staðgengill hans. Forseti skiptir öðrum verkum með heimavistarráðsfulltrúum eftir því sem hann telur þörf á.

4. Heimavistarráð fjallar um mál sem koma upp vegna brota á reglum heimavistar og ákveður viðurlög vegna brotanna. Úrskurði ráðsins er einungis hægt að breyta í samráði við skólameistara þess skóla sem íbúi er í og er dómur skólameistara endanlegur.

5. Heimavistarráð fjallar þó ekki um mál er varða meðferð áfengis og annarra vímuefna. Slíkum málum skal heimavistarstjóri umsvifalaust vísa með umsögn til skólameistara viðkomandi skóla sem kveður á um viðurlög.

6. Rísi óánægja með störf heimavistarráðs getur 20% íbúa borið fram vantraust á ráðið. Skal vantrausts tillagan tekin fyrir á almennum fundi heimavistar. Hljóti hún meirihluta atkvæða skal ráðið láta af störfum þegar í stað og nýtt heimavistarráð kosið. Þær kosningar skulu vera í höndum þriggja manna kjörstjórnar sem fundurinn kýs.

7. Almenna fundi heimavistar skal boða með tveggja daga fyrirvara með auglýsing­um við ganga heimavistar. Fundur er löglegur ef löglega er til hans boðað. Öllum íbúum er skylt að sækja fundi. Forföll skal tilkynna til starfsfólks. Einfaldur meirihluti ræður á fundunum. Rita skal fundargerð um fundinn.

8. Leita skal samþykkis heimavistarstjóra til fundarhalda eða samkomuhalds í setustofu eða annars staðar í húsum heimavistar.

II

1. Íbúar heimavistar skulu ávallt ganga hljóðlega um húsakynni og mega aldrei raska ró íbúa með hávaða og illri umgengni.

2.  Öll meðferð áfengra drykkja og annarra vímuefna í húsum og á lóð heimavistar er stranglega bönnuð. Brot á þessu ákvæði varðar riftun á húsaleigusamningi. Riftun samnings er í höndum viðkomandi skólameistara og skal vera skrifleg. Skal íbúi vera fluttur úr húsum heimavistar innan átta daga frá því samningnum er sagt upp. Íbúar mega aldrei koma undir áhrifum áfengis á heimavistina. Drukknu fólki er ávallt óheimilt að vera á vistinni. Reykingar eru bannaðar í húsum og á lóð.

3. Íbúar heimavistar skulu halda herbergjum sínum hreinum og snyrtilegum í samræmi við leiðbeiningar um hreingerningar og umgengni, sem er hluti af leigusamningi. Íbúar skulu ganga vel um öll hús, lóð og umhverfi heimavistar.

4. Herbergi íbúa eru tekin út í upphafi leigutíma og þegar honum lýkur. Er þá skráð útlit, ástand herbergis og búnaðar og staðfest af leigutaka og leigusala. Hús og búnaður eru á ábyrgð íbúa allan leigutímann. Hver íbúi heimavistar greiðir trygging­ar­gjald við upphaf leigutíma sem stjórn Lundar ákveður. Tryggingargjaldið er endurgreitt í lok leigutímans ef engar skemmdir hafa orðið á húsum og búnaði. Skemmdir á húsum eða búnaði skal tilkynna starfsmanni tafarlaust. Ber að bæta skemmdir að fullu. Skemmdir, sem unnar eru vísvitandi eða ekki er tilkynnt um, geta valdið því að leigusamningi er rift.

5. Sérhver íbúi heimavistar getur kært brot á reglum til fulltrúa í heimavistarráði, til heimavistarstjóra eða beint til viðkomandi skólameistara. Endurtekin brot á almennum reglum heimavistar geta valdið því að leigusamningi viðkomandi íbúa er rift. Riftun samnings er í höndum viðkomandi skólameistara og skal vera skrifleg.

III

1. Hús heimavistar eru læst frá klukkan 22:00 til klukkan 07:00 virka daga en um helgar frá 20:00 til klukkan 07:00. Þá skal enginn óviðkomandi vera í húsum heimavistar. Öryggisvarsla er allar nætur. Íbúar skulu gæta þess sérstaklega að næturferðir þeirra valdi engu ónæði. Næðistími er á frá klukkan 23:00 og 07:00 alla daga nema um helgar þá er næðistími frá 23:00 til 10:00. Í próftíð skal vera algert næði allan sólarhringinn og enginn utanaðkomandi í húsunum.

2. Íbúum er heimilt að  fengnu leyfi að hafa hjá sér gest að næturlagi með samþykki herbergisfélaga. Ef íbúi og/eða herbergisfélagið er undir lögaldri þarf  leyfi viðkomandi foreldra/forráðamanns.  Sótt er um að hafa næturgest á sérstöku eyðublaði. Næturgestir og aðrir gestir íbúa heimavistar eru að fullu á ábyrgð gestgjafa og skulu hlíta öllum sömu reglum og íbúar sjálfir. Sækja þarf um leyfi til að hafa næturgest með tveggja sólarhringa fyrirvara.

3. Íbúi sem er burtu lengur en sólarhring, skal af öryggisástæðum skrá sig á þar til gert eyðublað í anddyri áður en farið er.

4. Brjóti íbúi heimavistar ofangreindar reglur, skal heimavistarstjóri tilkynna brotið til viðkomandi skólameistara tafarlaust sem tekur þá ákvörðun um viðurlög. Viðurlög eru áminning, brottrekstur um ákveðinn tíma eða riftun á leigusamningi. Sinni íbúi ekki endurtekinni áminningu vegna brota er leigusamningi rift og skal íbúinn vera farinn úr húsum heimavistarinnar innan átta daga frá riftunardegi, nema brotið sé svo alvarlegt að dómi skólameistara að íbúinn skuli víkja tafarlaust.