Reglur Heimavistar MA og VMA

Reglur Heimavistar MA og VMA

  1. Framkvæmdastjóri heimavistar ber ábyrgð á daglegum rekstri og eftirliti með umgengni, aga og reglum í samráði við stjórn Lundar ses.
  2. Sérhver íbúi ber ábyrgð á að fylgja þeim reglum um aga og umgengni sem gilda á heimavistinni og eru í samræmi við ákvæði skriflegs leigusamnings sem íbúi og Lundur gera sín á milli.
  3. Íbúum er óheimilt að neyta áfengis eða annarra vímuefna í húsnæði heimavistarinnar eða á lóð hennar, vera þar undir áhrifum slíkra efna eða hafa þau eða búnað til neyslu þeirra í vörslu sinni.

    • Um meðferð mála vegna gruns eða brota gegn ákvæði þessu, þar á meðal um áfengis- og vímuefnapróf, upplýsingagjöf til forsjáraðila og afleiðingar brota, fer samkvæmt Viðauka I við húsaleigusamning íbúa. Meðferð íbúa á áfengi og öðrum vímuefnum í húsinu og á lóð heimavistar er stranglega bönnuð. Varðandi meðferð áfengis og annarra vímuefna er átt við að bannað er að neyta þeirra, vera undir áhrifum efnanna, hafa efnin í vörslum sínum eða hafa tæki til neyslu í vörslum sínum í húsnæði heimavistarinnar, eða á lóð hennar.

  4. Íbúar mega aldrei koma undir áhrifum áfengis eða annarra vímuefna á heimavist. Gestum íbúa á heimavist er óheimilt að vera á heimavist ef þeir eru undir áhrifum áfengis eða annarra vímuefna.
  5. Öll notkun tóbaks, rafretta og annarra nikótínvara, þar á meðal munn- og neftóbaks, nikótínpúða og veipa, er óheimil í húsnæði og á lóð heimavistarinnar.

    • Öll notkun á rafrettum/veip og nikótínvörum, þ.m.t. nikótín púða er óheimil í húsnæði og á lóð heimavistar. Með rafrettum er átt við tæki sem notað er til neyslu á gufu frá því. Ef íbúi á heimavist verður uppvís að brotum á tóbaksbanni þá skal áminna hann skriflega. Í áminningunni skal þess getið að ítrekað brot varði riftun á leigusamningi. Ef íbúar á heimavist eða gestir þeirra verða uppvísir af því að nota rafrettur í húsnæði heimavistar skal gera þær upptækar. Framkvæmdastjóri heimavistar eða staðgengill framkvæmdastjóra skal einnig aðvara íbúa skriflega um að það geti varðað riftun á leigusamningi ef brotið er ítrekað gegn reglum um notkun rafretta. Tilkynning um riftun leigusamnings skal vera skrifleg og skal íbúi á heimavist hafa rýmt herbergi sitt innan sjö (7) daga frá dagsetningu tilkynningar um riftun.

  6. Íbúum og gestum er með öllu óheimilt að hafa á heimavistinni vopn eða aðra muni sem skapað geta slysahættu. Sama gildir um eftirlíkingar sem hægt er að taka í ógáti sem raunveruleg vopn. Öll meðferð elds er jafnframt óheimil í húsnæði og á lóð heimavistarinnar, þar á meðal notkun flugelda, kerta og reykelsis..
  7. Óheimilt er að hlaða rafhlaupahjól eða önnur rafhjól í herbergjum. Slík tæki má eingöngu hlaða á þar til skilgreindu sameiginlegu svæði eða í hjólageymslu heimavistarinnar.
  8. Íbúar heimavistar skulu halda herbergjum sínum hreinum og snyrtilegum í samræmi við leiðbeiningar um hreingerningar og umgengni, sem eru hluti af leigusamningi. Íbúar skulu ganga vel um öll hús, lóð og umhverfi heimavistar.
  9. Bannað er að elda á herbergjum. Þá eru jafnframt eldunartæki, t.d. brauðrist, loftsteikingarpottur ( airfryer) og poppvél, svo eitthvað sé nefnt, bönnuð inn á herbergjum. Samlokugrill fyrir samlokur, hraðsuðuketill og kaffivél eru leyfð á herbergjum en ekki önnur eldunartæki.
  10. Eingöngu er heimilt að nota kennaratyggjó þegar hengt er upp á veggi, húsbúnað, hurðir eða aðra fleti á herbergjum heimavistar. Lím t.d. á LED-borðum getur valdið skemmdum með tilheyrandi kostnaði fyrir íbúa.
  11. Það er með öllu óheimilt að leggja húsgögn á hlið vegna hættu á skemmdum á parketi.
  12. Gæludýr eru ekki heimil í húsnæði heimavistar.
  13. Neyðarútganga skal einungis nota í neyðartilvikum, svo sem í eldsvoða eða annarri hættu sem krefst tafarlausrar rýmingar. Óheimilt er að nota neyðarútganga til daglegrar notkunar.
  14. Herbergi íbúa eru yfirfarin í upphafi leigutíma og þegar honum lýkur. Er þá skráð útlit, ástand herbergis og búnaðar og ástand staðfest af leigutaka og leigusala. Bannað er að flytja húsgögn milli herbergja. Húsbúnaður er á ábyrgð íbúa allan leigutímann. Íbúar eiga að læsa herbergjum sínum og hirslum enda bera þeir ábyrgð á herbergi og húsbúnaði ef óboðnir gestir ganga þar um.
  15. Hver íbúi heimavistar greiðir tryggingargjald við upphaf leigutíma sem stjórn Lundar ákveður. Tryggingargjaldið er endurgreitt í lok leigutímans ef engar skemmdir hafa orðið á húsum og búnaði, sbr. gr. 10 húsaleigusamningsins. Skemmdir á húsum eða búnaði skal tilkynna starfsmanni tafarlaust. Skemmdir, sem unnar eru vísvitandi eða ekki er tilkynnt um, geta valdið því að leigusamningi er rift.

 

II

  1. Húsnæði heimavistar er læst en íbúar hafa aðgang að því allan sólarhringinn með korti. Öryggisvarsla er allar nætur. Íbúar skulu gæta þess sérstaklega að næturferðir þeirra valdi engu ónæði.
  2. Næðistími er frá kl. 23:00 til kl. 07:00 virka daga og frá kl. 23:00 til kl. 10:00 um helgar. Gestir skulu hafa yfirgefið húsnæðið þegar næðistími hefst. Íbúar heimavistar og gestir þeirra skulu ávallt ganga hljóðlega um húsakynni og mega aldrei raska ró íbúa með hávaða og slæmri umgengni.
  3. Á próftíma skal vera algert næði allan sólarhringinn og enginn utanaðkomandi í húsunum.
  4. Íbúum er heimilt, að fengnu leyfi þjónustustjóra, að hafa hjá sér gest að næturlagi með samþykki herbergisfélaga. Ef íbúi og/eða herbergisfélagi er undir lögaldri þarf leyfi viðkomandi foreldra/forráðamanns. Sótt er um að hafa næturgest á þar til gerðu eyðublaði á heimasíðu heimavistar. Næturgestir og aðrir gestir íbúa heimavistar eru að fullu á ábyrgð gestgjafa og skulu hlíta öllum sömu reglum og íbúar sjálfir. Sækja þarf um leyfi til að hafa næturgest með tveggja sólarhringa fyrirvara. Óheimilt er með öllu að hleypa inn gestum eftir lokun húsnæðis sem ekki er leyfi fyrir. Þá er íbúum einnig óheimilt að lána lykla að húsnæði og/eða herbergjum.
  5. Íbúar bera ábyrgð á gestum sínum og á þeim sem þeir veita aðgang að húsnæði heimavistar. Íbúi skal sækja gesti sína í anddyri og fylgja þeim um húsnæði heimavistarinnar. Gestir mega ekki vera einir í sameiginlegum rýmum eða á herbergi íbúa.
  6. Íbúi sem er fjarverandi lengur en sólarhring, skal af öryggisástæðum skrá sig á þar til gert eyðublað á heimasíðu heimavistar.
  7. Almennir fundir heimavistar svonefndir gangafundir eru boðaðir með tveggja daga fyrirvara með auglýsingum við ganga heimavistar. Öllum íbúum er skylt að sækja boðaða gangafundi enda þar fjallað um málefni sem varða alla íbúa. Forföll skal tilkynna til starfsfólks.
  8. Leita skal samþykkis framkvæmdastjóra heimavistar til fundarhalda eða samkomuhalds í setustofu eða annars staðar í húsum heimavistar.

Uppfært 12.08.26