Heimavist MA og VMA

Heimavist MA og VMA

Heimavist MA og VMA er heimavist fyrir nemendur sem stunda nám við Menntaskólann á Akureyri og Verkmenntaskólann á Akureyri. Heimavistin er staðsett á syðri brekkunni við Eyrarlandsveg, við hliðina á Íþróttahöllinni og Menntaskólanum á Akureyri.  Þá er heimavistin staðsett í innan við 10 mínútna göngufæri við Verkmenntaskólann á Akureyri. Frá heimavistinni er stutt að fara m.a. í sund, í miðbæinn og matvörubúðir.

Á heimavistinni geta búið um 330 nemendur en heimavistin samanstendur af tveimur byggingum sem ganga undir nöfnunum gamla vistin og nýja vistin. 

Eftirfarandi vinnureglur eru hafðar til hliðsjónar við úthlutun  á leigurými á heimavistinni:

1. Ólögráða nemendur beggja skólanna hafa forgang
   1. Allir nýnemar
   2. Allir aðrir ólögráða
2. Nemendur sem áður hafa verið íbúar á heimavist (sem hafa ekki gerst brotlegir við reglur heimavistar).
3. Lögráða nemendur sem geta ekki stundað námið í heimabyggð, búseta hefur bein áhrif á möguleika þeirra á viðkomandi námi / útskrift.
4. Horft er til fjarlægðar lögheimilis frá heimavist við úthlutun. Hvort að höfnun á plássi á heimavist hafi afleiðingar á möguleika nemanda til að stunda nám í öðrum hvorum skólanum. Ef hafna þarf vegna fjarlægðar þá er miðað við að þeir sem búa næst skólunum gæti þeim verið hafnað vegna nálægðar við heimavist.

Heimavist áskilur sér rétt til að víkja frá framangreindum vinnureglum í sérstökum tilvikum, enda byggir slík ákvörðun á málefnalegu og faglegu mati.

Uppfært júní 2026